رجيم الكيتو .. إزاي نمشي على الكيتو دايت وإيه أضراره؟

تنزيل الوزن يُعتبر من أحلام البعض اللي بيعانوا من سمنة أو وزنهم زاد شوية عن الطبيعي، وبالتالي بيلجأوا لأنواع حميات زي رجيم الكيتو .

لكن قبل ما يبدأوا في اتباع الكيتو دايت لازم يعرفوا إن مش زي أي حمية تانية، بل إنها من أصعب الحميات وليه فوائد وأضرار.

الرجيم ده بيعتمد على أكل الدهون بس وتقليل الكاربوهيدرات جدًا بل إن فيه ناس بتمنعها تمامًا.

وتقليل الكربوهيدرات ده واستبدالها بالدهون هيساعد في عملية الحرق بنسبة كبيرة، وبالتالي هينزل الوزن.

لو مش عايزين نمنع الكربوهيدرات فمتاح لينا 50 جرام منها بس في اليوم الواحد. 

وبعد كام يوم الجسم مش هيلاقي حاجة ياخد منها طاقة غير الدهون، لأن السكر بيقل جدًا فيه بسبب تقليل الكاربوهيدرات.

فلما يبدأ ياخد طاقة من الدهون هتبدأ عملية تنزيل الوزن؛ لأن الدهون بالفعل هتبدأ تتحرق، سواء اللي بتدخل أو اللي المتخزنة.

طبعًا لازم نعرف إننا مينفعش نمشي على الرجيم ده من غير دكتور تخسيس لأن ليه أضرار كتير على الصحة. 

وفي موضوعنا النهاردة، هنوضح رجيم الكيتو وفوايده وأضراره وإزاي نقدر نمشي عليه.

رجيم الكيتو 

قبل ما ندخل في فوايده أو أضراره لازم نعرف إيه هو رجيم الكيتو أصلًا وبيعتمد على إيه في تنزيل وزن الإنسان.

أول حاجة هنعرفها في الكيتو دايت إنه نظام غذائي منخفض الكربوهيدرات، يعني بنقلل فيه أي أكلات فيها كارب بل ممكن نمنعها.

والأكلات اللي فيه كربوهيدرات بتشمل العيش بكل أنواعه ومعظم أنواع الفاكهة والحبوب زي الرز والشوفان. 

كمان الرجيم ده بيمنع فيه أكل الحلويات بكل أنواعها عشان نقلل كمية السكر في الجسم، زي الحلويات الشرقية أو السكر أو العسل الأبيض.

وده بيرجع لإن الكارب والسكر بينتجوا طاقة للجسم وبالتالي بيخزن الجسم الدهون.

لكن لما نمنعهم فهيضطر الجسم إنه ياخد طاقته من الدهون ويحرقها أول بأول بدل ما يخزنها.

وبالتالي فالكيتو دايت هيعتمد في الأكل على الاطعمة اللي فيها دهون صحية وبروتينات، زي اللحمة والفراخ والسمك. 

ده مش معناه إننا ناخد وجبات غذائية دهونها وكربوهيدراتها عالية جدًا، لأنك بتدي للجسم دهون وسكر في نفس الوقت، وده هيسببلك مشاكل أكتر.

وبالتالي فإننا نقدر ناكل في الرجيم ده الأكل اللي فيه دهون بنسب معقولة ومفيهوش كارب أو فيه بنسبة قليلة، وطبعًا نمنع السكر.

يعني مثلًا نقدر ناكل أنواع السمك المختلفة، وكمان خضروات معينة زي الجرجير والخس والفجل والسبانخ والكوسة والقرنبيط والبروكلي.

كمان نقدر نطبخ الأكل بزيت جوز الهند وممنوع ناكل بزيت عباد الشمس أو الذرة، ونقدر ناكل المكسرات والزبدة والقشطة والشيكولاتة الداكنة.

رجيم الكيتو 

الاطعمة المناسبة لـ رجيم الكيتو

بالنسبة للأكل المناسب للكيتو دايت فده بيشمل المأكولات البحرية كلها زي السمك والمحار وسمك السلمون.

عشان كل الأسماك بتتبقى غنية بالفيتامينات والبوتاسيوم وخالية من الكربوهيدرات تقريبًا، وده اللي احنا عايزينه. 

فيه كمان بعض أنواع الخضار اللي منخفض الكربوهيدرات والسعرات الحرارية، وغني بعناصر غذائية تانية زي فيتامين ج والمعادن المختلفة. 

من ضمن أنواع الخضار اللي بنتكلم عنها هي "أفوكادو، بروكلي، كرنب، قرنبيط، خيار، فاصوليا خضرا، بتنجان، خس، فلفل أخضر، سبانخ، طماطم، كوسا".

عندنا برده الجبنة بأنواعها، واللي ممكن ناكلها لو ماشيين على نظام الكيتو، وده لأن فيها نسبة دهون عالية وكارب منخفض.

على سبيل المثال عندنا "الجبنة البيضا، الشيدر، الفيتا، الجبنة الكريمي، الحلومي، بارميزان، موزاريلا، وغيرها".

زي ما ذكرنا قبل كدا الأفوكادو من الخضار الصحي جدًا ومفيد في الحمية دي، لأن مفيهوش كارب كتير.

يحتوي الأفوكادو على نسبة عالية من الفيتامينات والمعادن، بما في ذلك البوتاسيوم، وهو معدن مهم قد لا يحصل الكثير من الناس على ما يكفي منه.

اللحمة والفراخ من الأكلات الأساسية في رجيم الكيتو لأنها مصادر مهمة للبروتينات ومفيهاش كربوهيدرات عالية. 

البيض كمان مهم جدًا في نظام الكيتو بل إنه يعتبر غذاء مثالي للي ماشيين على الرجيم ده.

بالنسبة للدهون الصحية اللي مسموح بيها ونقدر نعمل الأكل بيها فعندنا مثلًا زيت جوز الهند وزيت الزيتون والسمنة والقشطة البلدي. 

الاطعمة المناسبة لـ رجيم الكيتو

برده فيه الزبادي اليوناني والجبنة القريش المهمين في النظام ده بسبب احتوائهم على بروتينات كتير وكارب قليل.

نقدر ناكل في رجيم الكيتو المكسرات والبذور لأنها بتساعد على الشبع وغنية بالدهون الصحية والألياف. 

أخيرًا عندنا الشوكولاتة الداكنة والكاكاو الخام واللي هما مصادر لذيذة لمضادات الأكسدة.

اقرأ أيضًا: الأطعمة المناسبة لنظام الكيتو .. المسموح والممنوع

فوائد الكيتو دايت

أول حاجة هنلاحظها في الكيتو دايت إنه بينزل الوزن وده أصلًا الهدف الأساسي من إننا نمشي عليه.

وده طبعًا بيحصل لما بنقلل السكريات والكربوهيدرات، فمش بيلاقي الجسم حاجة يحرقها غير الدهون عشان يزود طاقته.

أما تاني حاجة بيعملها نظام الكيتو إنه بيتحكم في مستوى سكر الدم لإننا بالفعل بنقلل السكريات وبنقلل الاكل اللي بيتحول لسكر في الجسم.

حتى الاعشاب اللي بنشربها والعصاير وأي حاجة مش بنحط فيها سكر، وبالتالي فهو مفيد للناس اللي عندها سكر. 

كمان الأكل اللي بناكله في نظام الكيتو بيخلي الجسم يفرز حاجة اسمها كيتونات، والكيتونات دي بتزود تركيز الدماغ ونشاطها بشكل كبير.

زي ما قولنا قبل كدا الجسم بياخد طاقته من الدهون المتخزنة عشان بيضطر إنه يحرقها، وبالتالي طاقة الجسم بتزيد وبيبقى فيه نشاط علطول.

إحنا بنعتمد في نظام الكيتو على الدهون الصحية مش أي دهون تانية زي زيت جوز الهند والزيت الزيتون والسمنة البلدي.

وبالتالي مستويات الكوليسترول في الدم بتتحسن بدرجة كبيرة عشان مش بنستخدم دهون مهدرجة أو الدهون اللي بتتراكم في الشرايين.

مقاومة الإنسولين في الجسم ممكن إنه يسبب مرض السكر من النوع التاني، ولكن إحنا بنقلل الحلويات والسكريات في الكيتو دايت وده بيظبط مستوى السكر في الجسم، وبيقلل الأنسولين. 

ممكن توصل فوائد الكيتو دايت لإنها بتحسن من البشرة، لإننا بنقلل الكربوهيدرات في الأكل واللي بتسبب أصلا زيادة حب الشباب.

فوائد الكيتودايت

تعرف على النظام الغذائي منخفض الكربوهيدرات .. الأكل الممنوع والمسموح

أضرار النظام ده

على الرغم من فوائده الكتير وإنه من أنواع الأنظمة السهل نمشي عليها، إلا إنه ليه أضرار كتير لازم نعرفها.

أول حاجة ممكن تحصل لو بدأتي تمشي على الرجيم ده التشنجات او تقلصات الساق.

وده بيحصل باليل أو الصبح بسبب نقص المعادن وخاصة الماغنسيوم، وبالتالي لازم تشربي سوايل كتير.

كمان هيحصل جفاف للجسم واللي بيسبب إمساك، وبالتالي مهم جدًا نشرب مية كتير وسوايل وخضار كتير برده. 

الرجيم ده ممكن يسببلك خفقان في القلب لكن متقلقيش من الموضوع، اشربي مية كتير وسوايل ولو الموضوع استمر خدي مكمل بوتاسيوم مرة واحدة في اليوم.

هو هيزود نشاطك جدًا وتركيزك لما تتعودي عليه، لكن في بدايته هتحسي بخمول وتعب وعدم تركيز.

أضرار رجيم الكيتو 

رجيم الكيتو ممكن ينزل شعرك لفترة مؤقتة، لكن وارد جدًا انه ميحصلش حاجة من دي، فالموضوع ده نادر إنه يحصل.

ممكن كمان مستوى الكوليسترول في الدم يعلى بسبب زيادة الكوليسترول الجيد في الجسم.

كمان ممكن تتصابي بحصوات مرارية لكن في أغلب الأمر العلاج بيكون سهل.

بالإضافة إلى ذلك ممكن يحصل عسر هضم وحرقة في المعدة لكن في الأول بس وقللي كمية الدهون ساعتها. 

ممكن برده يحصل حكة في الجلد وأضرار للكبد بسبب وجود دهون كتير في عملية التمثيل الغذائي، وكمان مشاكل في الكلى. 

أخيرًا قرار إنك تمشي على رجيم الكيتو يرجعلك، لكن قبلها إعرفي كل حاجة عنه وإزاي تمشي عليه وكمان إيه الأكل اللي ينفع معاه واللي ممنوع فيه زي كل كل السكريات والكربوهيدرات، وبرده لازم تعرفي أضراره وآثاره الجانبية زي الهبوط والتشنجات وده بيحصل في أوله بس، وهو ده اللي شرحناه من خلال موضوعنا النهاردة. 

المصادر.. دليلك الشامل حول نظام الكيتو دايت 2021.. وجدول أكلات أسبوعي

نظام الكيتو الغذائي هو نظام بيعتمد علي تقليل النشويات و الاكثار من الدهون الصحية، و ده بيؤدي الي ان الجسم لما مش بيدخلة كاربوهيدرات بيبدأ في حرق الدهون و بالتالي نزول الوزن. و زي ما فيه فوائد كتير لنظام الكيتو على الجسم فهو ليه كمان أضرار لازم نكون عارفينها قبل ما نقرر نمشي على الرجيم ده، ومن ضمن التأثيرات دي انه بيسبب تساقط الشعر واضطرابات ف المعدة، وفي موضوعنا النهاردة قررنا نقولك كل الفوائد والأضرار عشان تقرري هتعملي إيه بناء عليها.

 

مواضيع ذات علاقة