حساسية الطعام .. اعرف إيه الأكل اللي بيسبب حساسية

كتير من الأطفال وحتى الكبار بيعانوا من حساسية الطعام والموضوع بيأثر على حياتهم كلها بشكل سلبي، وبالتالي لازم إزاي نتعامل معاها ونكتشفها.

حساسية الطعام مشهورة بين الأطفال بشكل كبير لإن مناعتهم ضعيفة وجسمهم مش بيستجيب لأنواع الأكل المختلفة زي الكبار.

وده بيزوّد العبء على الأمهات؛ لإنهم لازم يكونوا عارفين أعراض الحساسية دي وإزاي يكتشفوها في أطفالهم.

وفي الموضوع ده، هنعرف من خلال موقع "فودو" إيه هي حساسية الطعام بالتفصيل وأنواع الأكل اللي بيسببها.

اقرأي أيضًا: أجهزة كهربائية تسهل عليك مهامك في المطبخ

حساسية الطعام

عشان نعرف نتعامل مع المرض ده لازم نعرف طبيعة عمله في الجسم وإزاي بيأثر علينا بشكل سلبي.

أول حاجة لازم نعرفها هي إن الجهاز المناعي في جسم الطفل أو الإنسان البالغ مش بيعرف يترجم الأكل اللي داخله على إنه أكل صحي وبالتالي بيتعامل معاه على إنه حاجات لازم يحاربها.

وهو ده اللي بيخلي الجسم يرفض نوع الأكل ده أيًا كان؛ لإنه بيتعامل معاه بالفعل على إنه أشياء ضارة جواه.

أما عن أعراضها بشكل عام فهي بتسبب حكة وانتفاخ في اللسات وتقيؤ وإسهال وصعوبة في التنفس أو انخفاض ضغط الدم.

وكل الأعراض دي بتحصل خلال دقايق بسيطة وممكن تستمر لعدة ساعات، حسب شدة الحساسية.

ومن الضروري نعرف إن مرض عدم تحمل الطعام أو التسمم الغذائي هي حالات صحية مختلفة عن حساسية الأكل.

كما إن من الضروري نعرف إيه هي أنواع الأكل اللي بتسبب الحساسية دي وده بيشمل حليب البقر، الفول السوداني، البيض، المحار، الجوز، القمح، الأرز، والفاكهة.

وغالباً مسبب الحساسية بيكون بروتين موجود في الأكل، عشان كدا هنلاقي المكون الأساسي في معظم الأكل اللي بيسبب الحساسية هو البروتين.

حساسية الطعام عن الأطفال

حساسية الطعام عن الأطفال

شريحة كبيرة من الأمهات بتبدأ إنها تدخل الأكل العادي في وجبة الطفل قبل ما يتم سنة من عمره.

وبالتالي الحساسية دي ممكن تظهر في وقت مبكر جدًا للأطفال، وليها أعراض معينة.

على سبيل المثال فيه الحساسية التقليدية (المألوفة)، وهي المتعلقة بجهاز المناعة، وأعراضها بتظهر على الجلد،

وتشمل أعراض "إحمرار البشرة حول الفم، حكة وانتفاخ"، وفيه أنواع تانية من الحساسية بتكون أعراضها إسهال أو تقيؤ.

وبالتالي من الضروري جدًا إننا منقدمش الأكل الجديد للطفل في كل مرة، ونستنى نشوف رد فعله إيه تجاه الأكل.

فمثلًا لو هنقدم نوع مُعين من الخضار المطبوخ أو الفاكهة أو أي أكل، فلازم نقدمله نفس نوع الأكل عدة أيام عشان نتأكد من عدم وجود أي أعراض تجاه الأكل ده.

أما عن الأكل اللي بيسبب الحساسية للأطفال بشكل خاص فهي على سبيل المثال "منتجات الحليب، البيض، الفستق، منتجات الصويا، الفاكهة الاستوائية، الأسماك، أنواع من الجوز والسمسم".

 

أطعمة تسبب حساسية الطعام

البيض

وهو من أكثر الأكلات اللي بتسبب حساسية عند الصغيرين والكبار؛ وده بيحصل بسبب البروتين الموجود في البياض.

كمان فيه بعض الحالات اللي بيحصلها حساسية بسبب صفار البيض، والموضوع بيوصل لإن أي أكل فيه بيض ولو بنسبة قليلة بيتعب الشخص المصاب.

على سبيل المثال ممكن نحط البيض في البشاميل، أو نضيفه لأي نوع من الكيكات، وده هيظهر الحساسية فورًا عند المصاب لو أكل منها.

المأكولات البحرية

كمان المأكولات البحرين بتسبب حساسية عند بعض الأشخاص، وممكن أنواع معينة من السمك تزوّد فرص الإصابة بيها.

زي مثلًا سمك السلمون، والتونة، والكابوريا، والمحار، كل دول أنواع من السمك بتزوّد فرص الإصابة بحساسية الطعام.

وده بيرجع لإن الجهاز المناعي بيتعامل مع البروتينات الموجودة فيها على إنها أجسام ضارة لازم يقاومها.

لكن النوع ده من الحساسية بيصيب البالغين بشكل أكبر من الأطفال، وممكن كمان المشكلة تستمر مع تقدم العمر.

الحليب

ولعل حساسية الحليب وخاصة الحليب البقري، من أكتر أنواع الحساسية شهرة، خاصة عند الأطفال والرضع.

وهي كمان ممكن تصيب الكبار لكن غالبًا بتختفي مع التقدم في العمر.

القمح

حساسية القمح مزعجة جدًا لإن الشخص اللي بيصاب بيها لازم يبعد عن أي حاجة فيها قمح.

وطبعًا معروف إن القمح موجود في كل حاجة تقريبًا بناكلها زي المكرونة والعيش والبسكويت وغيره.

والحساسية دي بتسبب صعوبة امتصاص العناصر الغذائية اللي بتدخل الجسم وده بيسبب ألم شديد في المعدة، ومشكلات جلدية، والتهابات في الجسم.

أطعمة تسبب حساسية الطعام

الحساسية ضد المكسرات والفول

المكسرات

ممكن يظهر شوية أعراض حساسية لو أكلنا مكسرات زي ألم البطن والإسهال والغثيان والقيء.

وممكن كمان تتعرض لحساسية ضد نوع واحد من المكسرات أو ضد أنواع كتير.

الفول السوداني

الفول السوداني مش نوع من انواع المكسرات زي ما كتير فاكر، ولكنه ممكن يعمل حساسية زيه زي المسكرات.

وكمان أعراض بتبقى زي أعراض حساسية المكسرات، وممكن يصاحبه سيلان في الأنف وزكام.

لازم نعرف إن حساسية الفول السوداني بتطبق برده على زبدة الفول السوداني وزيت الفول السوداني وأي منتج تدخل فيه مكوناته.

فول الصويا

أي منتج بيدخل في تركيبه صويا ممكن يسبب حساسية الصويا، زي فول الصويا، وصوص الصويا.

لكن النوع ده من الحساسية أقل شيوعًا ومش بيحصل كتير، وممكن نكتشفه في سن صغير خاصة عند الرضع.

أما أعراضه فبتبدأ تظهر بعد وقت قليل من تناول منتجات الصويا، وبتزيد فرص الإصابة بحساسية الصويا للي عندهم أنواع تانية من الحساسية.

إليكي أيضًا: حجر البيتزا .. ما هو وكيف يمكن استخدامه وما هي بدائله؟

أطعمة ممنوعة لمرضى الحساسية

فيه شوية أطعمة ممنوع منها مرضى الحساسية بشكل عام وحساسية الأكل بشكل خاص؛ لإنها بتزود أعراض الحساسية.

والأطعمة دي بتزود إنتاج الجسم للهيستامين ودي المادة اللي جهاز المناعة بيقاومها عشان كدا بتظهر الحساسية.

والأكل ده على سبيل المثال هو "اللبن الرايب، الزبادي، السبانخ، الفراولة، الشيكولاته، الطماطم، الأطعمة المصنعة والمحفوظة".

كمان من ضمن الأكل الممنوع "البيض، المكسرات، السمك، الجمبري، القمح".

لازم نكون عارفين إيه الأكل اللي بيسببلنا حساسية أو بيسبب لأولادنا ونبعده تمامًا عن النظام الغذائي للمصاب.

بالإضافة إلى ذلك لازم مندخلش الأكل ده في أي وصفات تانية حتى لو بنسبة بسيطة عشان الجسم بيتحسس جدًا منه.

 

المصادر.. أبرز الأطعمة التي تسبب الحساسية

/home/ahmed-gouda/workspace/main-system

كتير مننا ممكن يتعرض للإصابة بحساسية الطعام أو إصابة طفله بيها، وبالتالي لازم نبقى عارفين إيه أعراض الحساسية دي وإزاي نكتشفها وإيه الأكل الممنوع ناكله لو إتصابنا بيها، وده اللي حاولنا نعرفهولكم في الموضوع ده بشكل بسيط.

 

مواضيع ذات علاقة